Tala ‘Uhinga Fakafaito‘o

Ko e kaveinga folau kuo fakamohe mei ‘ulu´: “Ke fakaivia, mo fofoa‘i ha loto fekumi mo vivili ‘i he Tonga´, ke ne lava ‘o fai tu‘utu‘uni mo ‘inasi he vahevahe taau ‘o e mo‘ui lelei fakalūkufua´. ‘Oku mau fiefia ke momoi atu e me‘angāue fakatekinolosia´ni, ke tokoni atu ki hono tokangaekina ho‘o Mo‘ui Lelei´.

Ko e ‘oa Tala ‘Uhinga Fakafaito‘o´kuo hiki ‘i he Lea Faka- Pilitānia´mo e Lea Faka-Tonga´, ‘a ia kuo lalanga‘aki e ngaahi fo‘i fe‘unu e nofo-‘a-kāinga´. Na‘e pau ke tānaki, ohi pea liliu mai e ngaahi lea muli, fakataha mo hono fatu ha ngaahi lea Faka-Tonga fo‘ou, ‘oku fa‘unga Faka-Tonga, mahinongofua mo tonu hono ‘uhinga fakasaienisi´, pea kei lea faka‘apa‘apa pē.

Ko e kano-loto e ngāue´ni, ko e tokoni ma‘au ke hoko ko ho kāpani. Neongo pe ‘oku fēfē ho’o Lea Faka-Tonga´pē Lea Faka-Pilitānia´, ‘e ‘aonga e ‘oa´ni, ki he kau mahaki´, kau ngāue falemahaki pe kilīniki´, toketaa´, nēsi´, to‘utupu´, fānau ako´, kau faiako saienisi´, ngaahi mātu‘a´, kau toulekeleka´ mo e kau fakatonulea´ foki. ‘Oku mole ke mama‘o ha taumu‘a ke fetongi ‘e he ‘oa´ni, e ngaahi fale‘i, sivi mo e faito‘o ‘a e Toketaa´ mo e kau ngāue fakafaito‘o´ .

Ko e ‘uluaki Tala ‘Uhinga Fakafaito’o eni kuo fa’u he Lea Faka-Tonga´’o fakakakato ai e ngaahi sisitemi ‘o e sino´, fakahingoa e ‘ānātomī mo hono ngaahi fakatātā, ngaahi alangamahaki´, ngaahi sivi fakafalemahaki´ mo e ngaahi lea fakafaito’o´. Ko e ola ia e vīsone ‘a e Puloka Health Consultancy ‘i he fengāue‘aki mo e Kiwa Digital, ‘o faitokonia ‘e he Ministry of Pacific Peoples, New Zealand, kae‘uma‘ā e Sōsaieti Lea Faka-Tonga´.

‘Oku mau ngāue fakataha mo taukave‘i ke tu‘uloa e Lea Faka-Tonga´he ko e ‘ahanga fe‘unga ia ke fetu‘utaki mo femahino‘aki ai ‘a e Toketaa´ mo e Tonga´ . ‘Oku ‘i ai e ‘amanaki lelei ‘e hoko e ki‘i ‘oa ko eni´, ko e ma‘ungatala falala‘anga mo e ‘ilo fakafaito‘o ‘i he lea faka-Tonga´, ma‘a hotau kāinga ‘i Tonga, Nu‘usila mo tu‘apule‘anga foki. Tauange ke tokoni ia ki hono pukepuke hotau anga fakafonua´, fakamahu’inga’i mo paotoloaki ‘etau Lea Faka-Tonga´. Ke langilangi’ia ai pē ‘a e Tukufonua -‘Otua mo Tonga hota Tofi’a´.

Mālō ‘aupito.